Plantun de Prouvènço

Pèr coumpara dos planto d'encò nostre

Stellaria graminea & Scrophularia nodosa

Stellaria graminea

Caryophyllaceae

Nom en français : Stellaire à feuilles de graminée.

Descripcioun :
L'esteleto-di-fueio-de-gramenum, pulèu raro au nostre, trachis dins li bos fres, li tourbièro e li relarg umide. Se recounèis eisadamen à soun port prim emé de tijo carrado e subretout à si fueio en lanço, longo e sènso pecou que dounon un pau d'èr à li dóu gramenum. Apoudèn que li sepalo an 3 nèrvi que se vèson bèn (fotò) e que li petalo fan de 3 à 8 mm.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai. Tant se pòu que siegue manjadisso e vertuouso coume soun cousin lou mourihoun.

Port : Erbo
Taio : 10 à 50 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Stellaria
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 7 à 10 mm
Flourido : Printèms - Estiéu

Sòu : Si (Ca)
Autour basso e auto : 0 à 1700 m
Aparado : Noun
Jun à juliet

Liò : Bos fres - Prado umido - Tourbièro - Proche de ribiero
Estànci : Mesoumediterran à Mountagnard
Couroulougi : Éurosiberiano
Ref. sc. : Stellaria graminea L., 1753

Erbo-dis-escrolo

Scrophularia nodosa

Scrophulariaceae

Nom en français : Scrofulaire noueuse.

Descripcioun :
L'erbo-dis-escrolo douno d'èr à l'erbo-dóu-siège, pamens èi mens forto, sa tijo èi carrado mai sènso alo e pleno (fotò). Ei gaire coumuno au nostre, aleva dins lis Aup marino. Trachis dins li relarg fres.

Usanço :
Coume soun noum lou dis, l'erbo-dis-escrolo èro emplegado pèr gari (o pulèu sougna) lis escrolo que soun de boufigo (fotò) que vènon dins lou còu en rapport emé la tuberculòsi que ié disien à l'Age-Mejan, en latin, struma o morbus regius (mau de rèi). A l'Age-Mejan li rèi an lou poudé de gari lis escrofo ("écrouelles" en francés). A forto doso la planto pourrié èstre empouisounanto.